James Watt

James Watt (19 de xineru de 1736, Greenock – 25 d'agostu de 1819, Heathfield Hall (en) ) foi un matemáticu y inxenieru escocés. Nació en Greenock, Escocia, y vivió y trabayó en Birmingham, Inglaterra. Foi un miembru clave de la Sociedá Llunar (Lunar Society). Munchos de los sos escritos consérvense na biblioteca "Birmingham Central". Watt inventó'l movimientu paralelu pa convertir el movimientu circular a un movimientu cuasi rectilliniu, del que taba bien argullosu, y el mididor de presión pa determinar la presión del vapor nel cilindru a lo llargo de tol ciclu de trabayu de la máquina, mostrando asina la so eficiencia y ayudándolu a perfeccionala. Les meyores qu'aportó a la máquina de vapor de Thomas Newcomen en 1763 representaron un pasu fundamental pa la revolución industrial. Watt descubrió que la máquina de Newcomen taba gastando cuasi tres cuartos de la enerxía del vapor en calecer el pistón y el cilindru. Watt desarrolló una cámara de condensación dixebrada que fizo medrar significativamente la eficiencia. Watt opúsose al usu de vapor a alta presión, y hai quien lu acusa de ralentizar el desarrollu de la máquina de vapor por otros inxenieros, hasta que les sos patentes espiraron nel añu1800. Xunto al so sociu Matthew Boulton lluchó contra inxenieros rivales como Jonathan Hornblower qu'intentó desarrollar máquines que nun cayeran dientro del ámbitu, estremadamente xeneralistas, de les patentes de Watt. La unidá internacional de potencia, el vatiu (o watt) lleva'l so nome.